وين رايح ؟؟

خلاص ماتت البسمة وحارت خطوة الاقدام
ولالي غير ذكراكم اسولف في طواريها

علامك ناوين ترحل وتتركني مع الاوهام
ترى بعدك علي اكبر من الدنيا وما فيها

تودعني وانا ضايق ودمعي بلل الاكمام
عسى ليلة وداعك مايعيد الوقت ماضيها

نسيت الوصل والطيبة نسيت الحلم والاحلام
نسيت اللي على شانك ولو يصعب اسويها

نسيت عيون تسهر لك وعنك تتركه و تنام
نسيت الشعر وحروفن على شانك قوافيها

نسيت الشوق واللهفة اذا شفتك بعد ايام
اعاتب ليلة تروح ولاتجي فيها

نسيت احلامنا كله ونحلم وش يجي قدام
نقول الحلم يتحقق ولو طالت لياليها

ترى لو طول غيابك احس بساعته اعوام
احس البعد مايرحم واقوم احسب ثوانيها

نسيت اطفال من عقبك غدو في زحمة الايتام
امانة من عقب صدر الام منهو يدفيها

نسيت شلون بيدينك تعلم مسكة المرسام
كتب اسمك على كفه وبلسانه يهجيها

اشوفك ماتبي تحكي او ان البال منك هام
تكلم قول اي كلمة عسى ناري تطفيها

وذاب البوح من عندك وماتت نشوة الاقلام
وعقبك يا بعد حالي حياتي من يسليها

فديتك لا تعاتبني اذا من عقبكم منظام
ترى نار الغلا تحرق وتكوي رجل واطيها

اشوف فراقك بعيني مع اسراب الليالي حام
عشان الروح لا ترحل عسى ترجع وتحييها

مدام انك خذيت اغلى شعوري واصدق الالهام
تعال وخذ معاك روحي *ترى لاغبت مابيها*