مثلك مثل غيرك تجين وتروحين
عادي ترى قلبي ولو تتركينه
أدريك مثل الوقت لازم تصيرين
لازم يجيلك يوم وتحالفينه
أقسي ولاني سائلك ليه تقسين
روحي مدام ان الجفا تعرفينه
خنتي ويعني قولي وش تستفيدين
خنتي عشانه وش يشوفك بعينه
تدرين في باله وش يقول بعدين
لابد يوم من الزمن تغدرينه
والا أنا قلبي تعود من سنين
ياما وياما غربلت به سنينه
عادي تعودنا على الجرح والبين
ومتعود الطعنات لو تطعنينه
ماهوب انا اللي اتبع اللي مقفين
واللي رحل يرحل ولا قلت وينه
شوفي بعينك لو قدرتي تشوفين
ولا شفتي المجروح لا تسألينه
صابر وساكت ياعسى ربي يعين
والا العنا مبطي وحن خابرينه
والله ماهمي لو انتي تخونين
يا كم خاين خلفنا تاركينه
وياكثر ماقد مات ورد البساتين
يموت واحنا بدمنا زارعينه
نتعب ونشقى للأسف بس بعدين
فجأه نشوف ان الجفا حاصدينه
عشنا وشفنا كثير لكن الى الحين
عيا البحر لا يستضيف السفينه
نمشي ولكن ماعرفنا على وين
أغراب واحنا اللي بنينا المدينه
ياقلب خلك من علوم المحبين
ياكثرهم كذاب ومصدقينه
الوافي اللي يحب حطوه مسكين
والخاين الغدار اصبح يازينه
الجرح في قلبي غدى اليوم جرحين
والهم اسمع في خفوقي ونينه
ياعين ياويلك لو القاك تبكين
وياقلب لا القى المشاعر حزينه
عيشي بدوني لو قدرتي تعيشين
عيشي حياتك بس عيشة سجينه
سجينة الأوهام حولك شياطين
عقلك وقلبك للخيانه رهينه
مسكينه انتي بس غير المساكين
حالك دمار وكل شي(ن) تبينه
روحي ولكن طالبك لا تردين
وانسي الغلا اللي راح وانسي حنينه
